Þessi indverski kjúklingur er bæði bragðríkur og í senn mildur. Hann er kjörin fyrir stórar fjölskyldur þar sem foreldrunum langar til að breyta ögn útaf vananum án þess að þurfa að hafa áhyggjur af börnunum eða þeim sem ekki vilja sterkan mat.

2,5 kg kjúklingabringur / kjúklingalundir

4-5 gulrætur

2 laukar

4 hvítlauksrif – 2 litlir hvítlaukar

1/3 ferskt engifer

2 stórir tómatar

1 bakki ferskur dvergmaís (babycorn)

130 gr þurrkaðar aprikósur

30 gr rúsínur

3 msk sesamolía

1 msk rauðvínsedik

2 dl kókosmjólk ( 2 litlar dósir)

4 tsk tómatpaste

Kryddblanda:

4 tsk tandori

1 tsk salt

2 tsk chiliduft

½ tsk kardimommuduft

1 tsk negulduft

3 tsk kanill

2 tsk estragon

• Blandið kryddinu saman við sesamolíuna og edikið, skerið bringurnar í strimla, gulræturnar og dvergmaísinn í bita og setjið útí kryddblönduna og látið marinerast.

• Sjóðið hrísgrjón

• Sjóðið apríkósurnar í litlu vatni í stuttan tíma rétt til að mýkja þær – uþb 5 mín.

• Skerið laukinn í þunnar sneiðar, saxið hvítlaukinn, rífið engiferið og steikið á pönnu við lágan hita.

• Bætið kjúklingnum, gulrótunum og dvergmaísnum út á pönnuna, hellið örlitlu vatni og rauðvínsediki út á. Látið malla.

• Skerið tómatana í teninga og aprikósurnar í sneiðar og látið útí ásamt rúsínunum.

• Bætið kókosmjólkinni og tómatmaukinu út í og látið malla þar til kjúklingurinn er orðin meyr. Smakkið og bragðbætið með kryddi ( tandoori, kanil, salti osfv.. )

Berið fram með hrísgrjónum.

Fyrir þá sem ekki þola sterkan mat þá er mælt með að hafa sýrðan rjóma sem meðlæti. Mér hefur þótt best að setja rjómaost út hjá mínum börnum svo að maturinn sé vel mildur og gangi vel niður hjá viðkvæmum munnum.

Það má einnig bæta glögg af rjóma út í réttinn.

Ágætis æfing í því að taka eftir litlu hlutunum dagsdaglega er að temja sér að horfa upp fyrir sig og koma þá auga á eitthvað sem hefði ef til vill farið framhjá þér.

Ekki gleyma að horfa upp.

Myndir og texti : Kolfinna Mjöll Ásgeirsdóttir

Hildur Ísdal Þorgeirsdóttir er sniðug og uppfinningasöm móðir tveggja drengja, þeirra Hilmars Snæs 5 ára og Hrafns Goða 8 mánaða.

Nýverið safnaði hún ásamt Hilmari, allskonar hlutum sem hefðu annars endaði í ruslinu. Skrúfum, íspinnaspýtum, kaffipokum, álpappír og klósettrúlluhólkum auk annara hluta sem vöktu áhuga þeirra. Ekkert fór til spillis.

Með hugmyndaflugið að vopni útbjuggu þau svo ævintýralega skemmtileg vélmenni úr “ruslinu” og voru svo almennileg að sýna okkur ferlið.

*Ath. Smellið tvisvar á myndirnar til þess að sjá þær stærri.

Myndir: Hildur Ísdal Þorgeirsdóttir

Texti: Kolfinna Mjöll Ásgeirsdóttir

 1. Þróaðu með þér nætursjón:

Ef þú getur farið lipurlega um í myrkri verður lífið á fróni öllu léttara og orkureikningarnir lægri.

2. Borðaðu nóg af súkkulaði:

Og hafðu orkubúskapinn í hámarki. Þannig safnarðu á þig hlýju lagi af spiki eins og selur í köldum sjó og þolir vel að lækka hjá þér hitann meðan  þú hefur það að auki gott.

3. Ekki vera heima hjá þér:

Að vera heimavið er of dýrkeyptur lúxus og hvers vegna að vera heima þegar það er yfirdrifið nóg af vatni og birtu streymandi frá glóperum á opinberum stöðum eins og söfnum og bókasöfnum.

4. Farðu á bílaþvottastöð:

Og þvoðu þér. Það er heitt vatn á þvottastöðinni við Hagatorg. Þvílíkur lúxus.

5. Borðaðu úti:

Loksins er komin góð ástæða til þess að leyfa sér að borða úti í meira mæli. Það er alltof dýrt og orkufrekt að elda heima svo það er best að skella sér út og fá sér smá Tapas eða sushi.

6. Borðaðu hjá vinum

Best er þó auðvitað að heimsækja gestrisna og þolgóða vini um sexleytið og sýna ekki á sér fararsnið. Hver veit nema þér verði boðið að sitja við horn eldhúsborðsins.

 7. Aðrir orkugjafar

Er ekki ráð að finna aðra orkugjafa þar sem okkar náttúrulegu auðlindir eru að verða jafn dýrar og þar sem þær skortir? Við mælum með því að öll iðja heimilismanna sé virkjuð með heimatilbúnum búnaði:  klósettferðin, kynlífið og heimaleikfimin.

 8. Fáðu þér belju:

Besti orkugjafinn hljóta þó að vera að koma sér upp nokkrum beljum í stofunni. Þær eru gefa frá sér mikinn varma eru fallegar og vinalegar og þú getur drukkið beint af spenanum. Það verða allir komnir með belju 2011.

 9. Tísku-ullarhamur:

Loksins hefurðu afsökun til að kaupa þér ultra mega tísku ullarselshaminn sem þig hefur alltaf langað svo í en ekki fundið þér leið til að raða ofar á forgangslistann.  

 10. Þvoðu þvottinn hjá mömmu:

Óskammfeilið en gott og gilt. Móðurfaðmurinn stækkar í kreppunni.

Mynd: Selshamur eftir Vík Prjónsdóttur.

Börnin eiga sitthvort herbergið þar sem áhugasvið þeirra fær að njóta sín í bland við eldri fjársjóði frá foreldrunum sem vekja upp fortíðarþrá þeirra sem líta við.

Selma hefur einstaklega næmt auga fyrir fallegum hlutum með sál og það er gaman að sjá gömlu leikföngin fá hlutverk innan um þau nýju.

Ynjur fengu að kíkja í heimsókn til krakkana, forvitnast um hvað þeim finnst skemmtilegast og örva skilningarvitin um leið.

Uppáhald Tönju Kristínar 8 ára

Leikfang: Build a Bear Bangsi sem hún fékk frá mömmu sinni og pabba. Hann heitir einmitt Tanja Kristín og talar meira að segja skilaboð frá foreldrum Tönju.

Dúkkuhúsið sem hún fékk í jólagjöf fyrir 3 árum er líka í miklu uppáhaldi.

Bók: Dimmalimm

Litur: Fjólublár

Matur: Píta

Skemmtilegast að gera: Opna pakkana á jólunum og fara á skauta.

Ætlar að verða: Graffískur hönnuður eins og mamma og kannski hárgreiðslukona.

Uppáhald Mikaels Arons þriggja ára að verða fjögurra.

Leikfang: Trésverð sem hann fékk á Spáni og flestir kallarnir hans, turtles, spiderman og  sandkallinn. Einnig minntist hann á spiderman tannburstann sinn.

Bók: Reyndar ekki bók, heldur margflett og skoðað blað um köngulóarmanninn.

Litur: Skær blár

Matur: Steiktur fiskur í raspi

Skemmtilegast að gera: Fara í hressandi tívolítæki og horfa á Spiderman.

Ætlar að verða: Stóri bróðir

*Ath. Smellið tvisvar á myndirnar til þess að sjá þær stærri.

Ljósmyndir og texti :Kolfinna Mjöll Ásgeirsdóttir

Tilvalið er að nota þessa grunnuppskrift og skipta um bragðefni. Setja til dæmis uppáhaldssúkkulaðið í staðinn fyrir bláber, skipta út berjategund og svo framvegis.

Kökurnar:

Uppskrift að u.þ.b. 16 kökum.

150 g. smjör (ósaltað)

2 dl. hrásykur

2 egg

3 dl. hveiti

1 tsk. lyftiduft

1/2 dl. hrein jógúrt eða AB mjólk

3 og 1/2 dl. bláber, fersk eða frosin

Ath. Ef berin eru frosin þarf að nota minna af jógúrt eða aðeins meira hveiti til þess að kökurnar verði ekki of blautar í sér.

Krem:

6 msk. rjómaostur

3 msk. 10 prósent sýrður rjómi

flórsykur eftir smekk  (gott að setja lítið í einu og smakka sig áfram)

smá vanillusykur

hrærið allt vel saman.

Aðferð:

Smjör og sykur hrært létt og ljóst.

Eitt egg sett í einu og hrært á milli.

Hveiti, lyftidufti , jógúrt og berjum blandað saman við.

Deigið er sett í form og bakað við 200 c í um það bil 15 mínútur.

Kökurnar látnar kólna aðeins áður en kreminu er smurt á og ef til vill skreytt með berjum.

Verði ykkur að góðu*

Texti og myndir : Kolfinna Mjöll Ásgeirsdóttir

Ég er Kristín Dagmar og er sjálfstætt starfandi sýningarstjóri. En ég hef sinnt ólíkum verkefnum að undanförnu, til að mynda stýrði ég Sjónlistarhátíðinni Sequences á síðasta ári ásamt Klöru Þórhallsdóttur. Einnig vann ég að sýningu í samvinnu við Magnús Árnason myndlistarmann í Náttúrufræðistofu Kópavogs en hún stendur enn yfir og ýmist annað sem ég hef verið að stússa í.

2.  Hver er bakgrunnur þinn?

Ég er listfræðingur að mennt og nokkuð nýskriðin úr skóla. Ég lauk BA námi úr listfræði við Háskóla Íslands vorið 2007. Þaðan fór ég beint í framhaldsnám í Skotlandi og lauk MA gráðu í samtímalistfræði og sýningarstjórnun frá Edinburgh College of Art síðasta vor.

3. Hvað er á döfinni?

Ég er að sýningastýra samsýningu í Hafnarborg- menningar og listamiðstöð Hafnafjarðar sem opnar föstudaginn 27. ágúst. Sýningin ber titilinn Að elta fólk og drekka mjólk og sýnir verk 19 íslenskra listamanna af ólíkum kynslóðum en í verkum þeirra er að finna ýmis tilbrigði húmors. Þetta eru þó ekki bara brandarakallar í íslenskri myndlist heldur felst húmorinn í framsetningu eða tungutaki verkanna sem snýr svolítið upp á hið venjubundna. Líkt og titilinn ber vitnis um. Viðfangsefnið stendur okkur vissulega nærri eftir sigur Besta flokksins í borgarstjórnarkosningunum fyrr á árinu og satírunni í kosningabaráttu þeirra og því tilvalið að kafa svolítið dýpra ofan í þetta fyrirbæri sem við köllum húmor. Í samvinnu við Þjóðfræðistofu verður líka efnt til málþings í tengslum við sýninguna laugardaginn 25.september. Þar er hugmyndin að kanna húmor í víðara samhengi, sem samfélgasrýni og valdatæki. 

4. Hvaðan kemur nafnið: Að elta fólk og drekka mjólk?

Yfirskrift sýningarinnar kemur úr einu verkanna á sýningunni en það er verk Sigurðar Guðmundssonar myndlistarmanns og heitir Ljóð (Að elta fólk og drekka mjólk) frá árinu 1972. Mig langaði að finna titil sem væri svolítið skemmtilegur en um leið svolítið absúrd en svo er hann líka mjög ljóðrænn. Verkið er sviðsett ljósmynd en þar er að finna leik að orðum í titlinum og bókstaflega framkvæmd á því sem hann lýsir. Verkið er frá upphafi þess tímabils í ferli listamannsins þegar hann setti ítrekað upp slíkar sviðsetningar í ljósmyndaverkum sínum Situations.

5. Hefur þú góða kímnigáfu?

Mér hefur alltaf þótt ég með einstaklega góðan húmor. En ég get að sjálfstögðu ekki verið viss um að allir séu sammála því. En það er einmitt þannig með húmor að hann er svo einstaklingsbundinn og breytilegur. Svo er maður svo misjafnlega stemmdur, stundum tekur maður upp á því að vera voðalega alvarlegur og ekki stekkur bros á vör yfir því sem maður skellihló að í gær. Stundum getur aulalegur húmor verið alveg frábær og stundum hefur maður meira bragðskyn á intelligent húmor. En það fer allt eigin viðhorfi.

6. Hvað skiptir þig mestu máli í lífinu?

Ætli það sé ekki að upplifa sig eiga innihaldsríkt líf sem skipti mann mestu máli. Svo það er bara að pakka því góðu innihaldi

7. Áttu þér einhverjar fyrirmyndir?

Já alveg milljón. Svona sitt lítið frá hverjum því enginn er fullkominn.

Litlir rauðir hermenn

Rifsber eru nytsamleg og hafa skarpt súrsætt bragð. Þau hafa verið nýtt í lækningarskyni og þá til hitalækkunar og til þess að bæta blóðflæði og ýta við ónæmiskerfinu. Þau eru einnig hægðalosandi. Rifsber innihalda nokkuð af trefjum, hafa hátt innihald c-vítamíns en í 100 grömmum eru 21 mg af C vítamíni. Í rifsberjum finnst einnig járn (1.2 mg í 100 gr) og járnið nýtist líkamanum vel í samfloti með C-vítamíni. C- vítamín er okkur nauðsynlegt svo að sár geti gróið og það eykur varnir líkamans, þar með talið ónæmiskerfið, gegn ýmsum sýkingum. Stresspúkar athugið þetta sérstaklega því líkaminn þarfnast aukins C- vítamíns þegar hann er undir álagi og því er alveg ónýtt að láta þessi nytsamlegu ber rotna á runnunum. Út að tína núna strax. (En skiljið eitthvað eftir handa blessuðum smáfuglunum.)

Sólber vaxa líka vel í görðum á Íslandi þó þau eigi oft erfiðara uppdráttar. Þau þurfa lengri tíma og meiri lofthita til að dafna en eru eins og rifsberin næringar -og trefjarík með eindæmum. Uppskeran á höfuðborgarsvæðinu virðist þó vera meiriháttar í sumar. Berin eru bragðmeiri  og sumum finnast þau jafnvel örlítið beisk. Berin eru oftast notuð til þess að útbúa síróp og þykkni og við höfum heyrt sögur af því hversu dásamleg þau eru til ísgerðar þótt við höfum ekki látið til skarar skríða í þeim efnum.

Brall og sullumall:

Rifsberjadrykkur

Prófið að setja rifsber og klaka í blandara og hrærið saman. Blandan verður þykk og freyðandi og bragðið kemur á óvart. Við settum örlítið af agavesýrópí út í blönduna til að sæta hana og sigtuðum hana til þess að losna við berjahratið.

Berja-pavlóva

Við kunnum vel við þessa uppskrift frá Nigellu og súr rifsberin smellpassa í þessa sykurbombu. Marengsinn á að vera þurr og stökkur að utan en seigur að innan. Ef að marengsinn mistekst, reynið aftur.  Passið að eggjahvíturnar séu volgar þegar þið þeytið þær og skálin og öll áhöld hrein. Okkur þykir síðan fallegt að sigta örlítið af flórsykri yfir berin í lokin. Það er sérstaklega gott að blanda saman rifsberjum, bláberjum og sólberjum.

Í marengs:

4 eggjahvítur

Sítróna

16 msk. sykur

1 tsk. hvítvínsedik

2 tsk. maísmjöl

nokkrir vanilludropar

Aðferð:

Smyrjið skál að innan með sítrónusafa. Þeytið volgar eggjahvíturnar í skálinni og þar til að þær eru nærri því stífþeyttar. Þeytið svo sykrinum varlega saman við í smáskömmtum og bætið svo út í edikinu og maísmjölinu jafnt og rólega. Að lokum getið þið bætt örlitlu af vanillu út í blönduna með sleif.

Setjið smjörpappír á bökunarplötu og gerið rúmlega 20 cm hring og hellið deginu innan hans. Hafið svolitla hæð í massanum, ekki fletja of mikið út.

Forhitið ofninn í 180 °C  en lækkið hitann í 150°C þegar þið setjið marengsinn inn í ofninn. Bakið botninn í  45 mín. Látið hann síðan kólna inn í ofninum svo hann verði ekki of blautur.

Snúið marengsinum á hvolf og smyrjið þeyttum rjóma yfir. Setjið svo ofan á rjómann bláber, rifsber og ef til vill sólber ef þið eigið þau til.

Klassískt rifsberjahlaup

Hefðbundna aðferðin er að gera hlaup úr rifsberjunum og það kunna allar þungvigtarhúsfreyjur og sveinar.  Varnaðarorð áður en hafist er handa: Ef hlaup mistekst hafa berin að öllum líkindum verið orðin of þroskuð. Rétti tíminn til að tína er núna!

Aðferð:

Notað er 1 kg af sykri á móti 1 kg af berjum, 1/2 bolli af vatni og við fengum ráð að setja með eina stöng af vanillu sem við höfum ekki gert áður en smakkaðist vel. Berin má sjóða á stönglinum. Þau þurfa að sjóða í um 15 mínútur þangað til þau eru sprungin. Þá er hratið og stönglarnir síuð frá. Við gerðum það með því að nota taubleyju sem við strengdum yfir stóra skál. Hreinn og tær rauður vökvinn er síðan settur aftur í pottinn með sykrinum og vanillunni og soðið upp í 20 mínútur. Engan sultuhleypi á að þurfa nema berin séu orðin of þroskuð.  Þá er bara að hlaupa út í búð og kaupa sultuhleypi. Hellið síðan sultunni heitri í dauðhreinsaðar krukkur og upp í topp. Látið kólna við stofuhita áður en þið rennið krukkunum eins og fagmenn inn í ísskáp.

Berjahlaup

3. Leyfið blöndunni að stífna að minnsta kosti 4 klukkustundir. Takið hana út um 10 mínútum áður en bera á fram.

4. Berið hlaupið fram með þeyttum rjóma með vanillu eða bara eitt og sér.

Á fatamörkuðum sem eru auglýstir um allan bæ má finna sér notaðar og nýjar flíkur á spottprís og ef liturinn hentar ekki þá er afbragðsráð að lita flíkina og setja þar með persónulegan svip á hana í leiðinni.

Ég  hef lumað á fatalitum úr Þorsteini Bergmann í þónokkurn tíma en alltaf miklað litunarferlið fyrir mér. Þegar ég loks lét verða af því að prófa litina komst ég að því að handlitun er einstaklega auðveld og svo skemmtileg tilraun að mig langaði helst að finna miklu fleiri flíkur til að regnbogalita.

Þú þarft:

Flík að eigin vali (hér er notast við 3 stk. 500 kr. boli af fatamarkaði og fölgulan náttkjól).

Einnota gúmmíhanska.

Fatatalit í dós (fæst í Þorsteini Bergmann á Skólavörðustíg)

30 gr. salt

1/2 lítra af soðnu vatni

Aðferð:

• Skolið flíkina og vindið vel.
• Sjóðið 1/2 lítra af vatni.
• Hellið sjóðandi vatninu í gamlan pott eða ílát sem þolir hita en er ekki notað í matargerð (liturinn á það til að loða við ílátin).
• Stingið gat á fatadósina og blandið duftinu út í sjóðandi vatnið.
• Setjið saltið út í litablönduna.
• Farið í gúmmíhanska.
• Leggið raka flíkina út í litað vatnið og hitið að suðu.
• Hrærið vel í og gætið þess að velta flíkinni til og frá til þess að fá jafna litun.
• Látið liggja í 20 mínútur og hrærið.
• Flíkin er skoluð  þar til vatnið verður tært.

Gott að hafa í huga:

Flíkin sem á að lita þarf að vera hrein og án bletta.

Blettir verða dekkri við litun.

Gerviefni verða ljósari og taka jafnvel ekki lit (sjá mynd af mussunni sem var úr bómull og gerviefni í bland).

Dósin miðast við 250 gr. af bómullarefni.

Hægt er að nota fleiri en eina dós í einu ef þið eruð með meira magn eða viljið dekkri lit.

30 gr. af salti á móti einni dós.

Litaðar flíkur skal þvo sér fyrst um sinn til að koma í veg fyrir að liturinn smiti í aðrar flíkur.

Muna litafræðina: ef þú litar gula flík með bláum lit þá verður hún græn, blá flík með rauðum fatalit verður fjólublá o.s.frv.

Góða skemmtun*

Myndir og texti: Kolfinna Mjöll Ásgeirsdóttir

Í tilefni af þeim drögum við fram skærin og útbúum einföld flögg og blómstur til skreytinga á tillidögum.

Blómsturlengja

Þú þarft:

skæri

band

rör

grófa nál

silkipappír

Aðferð:

• Brjótið pappírinn saman (þannig að þið getið gert mörg blóm í einu) og klippið út ferning.
• Teiknið blómamynstur á ferninginn eða klippið fríhendis (blómin þurfa alls ekki að vera fullkomin eða öll eins til að gleðja augað).
• Klippið út blóm í allskyns litum.
• Að blómaklippi loknu er komið að því að stytta rörin (ég sleppti því að nota gormana).
• Að lokum eru blómin( tvö eða fleiri saman) og rörabútarnir þræddir upp á band í blómsturlengju*

Fagnaðarflögg

Þú þarft:

skæri

límstifti

band

silkipappír (þessi fæst í Tiger)

Aðferð:

• Brjótið silkipappírinn saman og klippið út þríhyrninga (sem mynda tígla þegar þeir eru teknir í sundur)

• Klippið út  að vild í litum að eigin vali.

• Berið lím á pappírinn,brjótið tíglana yfir bandið, strjúkið vel yfir til þess að slétta flöggin og myndið  flagglengju.

Góða skemmtun í gleðinni*

Myndir og texti: Kolfinna Mjöll Ásgeirsdóttir